Berner (Gstaader) Klartext

Benz Hauswirth konnte am Samstag 23 Mitgliedsfirmen (30 Personen) und 4 Gäste zur GV im Kemmeriboden begrüssen. Seine eindrücklichen Worte zur Krise geben wir gerne im Originalton wieder (unten). Schwerpunkte waren der Entwurf neuen Statuten, der jetzt in die Vernehmlassung geht, dann der Holzmarkt und schliesslich das sehr interessante Referat von Hans-U. Kipfer (Kälin Täfer W’thur + Jakob Kipfer AG Trub) mit dem Titel „Die Bedeutung des Holzes in der 2000 Watt-Gesellschaft“ (separater Beitrag folgt)

Alles änderet sich

Wär vo üns hät voremene Jahr gsinet, wie schnäll wir in e söttigi Krise schlittere. Im Rückblick siwer alli gschider: 9 / 11 isch der Startschuss gsi vo däm Desaster. Alan Greenspan, der hochgjublet amerikanisch Notebankpräsidänt, hets müglich gmacht mit em billige Gäld. Die ganzi Wält het gmeint, es gangi nume no ufwärts. Alli si im Casino gsi. Wär der Warnfinger het uf ka, isch usglachet worde. Jedi börsekotierti Firma het Quartal für Quartal grösseri Umsätz u höieri Gwinne bekannt gä oder müesse bekannt gä!! Het si das nid, isch si brutal abgstraft worde. Die ganzi Wält het Sache produziert wo i dere Mängi i Normalzite gar niemer het brucht. Churz­frischtigi Gwinnmaximierig, Profitgier u absolut ke Nachhaltigkeit. U derna der gross Chlapf, u alles isch ganz anders. Z’erscht d’Finanzmarktkrise wo es no um virtuells Gäld isch gange, u de sehr schnäll d’Wält­wirt­schaftskrise, wo die reelli Wirtschaft inere Schnälligkeit u Heftigkeit vo ungloublichem Usmass het troffe. Sälbschtverständlich vo Börsianer u Medien no höi gspilt u herbi gredet. Hueschtet em Morge d’Börse z’Tokio, geit die Grippe pandemieähnlich am gliche Tag um die ganzi Wält Im Novämber hei in China 66'000 Firmene müesse zue tue, wo Sache hei produziert wo plötzlich niemer me het wölle. Millione vo Lüt si uf der Strass gstande. Z’Puppetheater vor EU, G20, WTO u wi si all heisse, die Organisatione mit gäng de gliche Gringe. Ob Sarkozy, wo zerscht redet bevor er sinet, Brown oder Merkel u anderi Lidensgnosse hei sofort Rezäpt ka; obwohl sie kei Ahnig hei ka, was die bewürke. Gäld, wo niene vorhande isch, i ungloubliche Mängene söll i d’Wirtschaft pumpet wärde. Gälddruckmachine chöi gstartet wärde u d’ Inflation lat grüesse. D’Skeptiker vo söttige Wirtschaftsprogramm wärde wider a Pranger gstellt. O der Barack Obama rüfflet d’Europäer, dass sie z’wenig tüe. Derbi müesse ja de mir wieder die ganze amerikanische Schulde zahle. Die, wo no öppis Erschparts hei, wo sie ar Börse nid hei verspekuliert, verlieres de i Zuekunft uf irem Bankbüechli mit emene  1/2 % Zins, vielne Spese u er e grosse Gäldentwärtig. Jetz geits a z.Läbige Was heisst das für üns chlinstrukturierte unrationelle rückwärtsgrichtete Bärnersager, wo der Bärnerregierig i der euphorische Boomziit no hei z’Koglerwärch im Seeland vermieset? Wie mu gset, wie d’Bündnerregierig em Sagiwärch in Domat/Ems jetz scho wider hilft, chönnti d’Bärnerregierig üns danke für die igsparte Millione. Es Merci wärde mer allwäg nid übercho u sicher o nid Hilf i der schwirige Ziz, will mir ja kenner „Cluster“ si. KMU’s sölles jetz wider richte. Aber wier Sager, chöi mier das? Antizyklisches Verhalte? Derzu bruchts Gäld, wo n üs niemer git. Nume wär het chöne Resärve schaffe, cha jetz überläbe I ha nech einisch gseit, dass a Undernähmer jede Morge sich muess frage: wie chan ich hüt Gäld verdiene u der Pris uehi tue. Rabatt cha jede gä. Jetz chunnt Stund vor Wahrheit. Wär der länger Atem het, überläbt. Jetz isch Innovation gfragt, Chundenähi, Flexibilität, Qualität. Mir Sager schaffe das. Villicht nid alli, will vom Staat u de Banke isch ke Hilf z’erwarte. KMU’s sölles richte, aber sobald es wieder ufwärts geit, simer wieder die chline, unflexible, rückwärtsgrichtete Chrämer. Will eis isch sicher wie ds Amen ir Chilche: O vo dere Krise wärde kenner Lehre zoge, wäder vor Politik no vo der Finanzwält  - trotz jetz usgsprochne Willensbekundigunge. U die nächschti Krise isch scho wieder programmiert . I hoffe dass die meischte vo üns das Sturmtief überläbe u hoffentlich gstärkt us däre Krise wärde usicho.